Urtarrilaren 28an, CO2 Emisioak Murrizteko Mundu Eguna ospatzen da, berotegi-efektuko gasek kliman, ingurune naturalean eta osasunean duten eragina gogorarazteko

Gure planeta txiki honek berezitasun bat du, inguratzen duen gasez osatutako geruza, indar kosmikoetatik babestuz eta azaleko tenperatura egonkor mantenduz, Lurreko bizitza posible egin duena. Duela milioika urte sortu zen atmosfera hori, eta modu naturalean aldaketak izan ditu milurtekoetan zehar, gertaera naturalek eragindako periodo hotzak eta beroak txandakatuz, hala nola asteroideen edo sumendien erupzio masiboen eragina, planetako bizitzan suntsipen handiak eragin dituztenak.

Giza jarduerak klima-aldaketa areagotzen du gaur egun. Industria Iraultzaz geroztik, gure energia-beharrak handituz joan dira, eta, behar horri aurre egiteko, erregai fosilak kontsumitu ditugu, ikatza, petrolioaren edo gasaren eratorriak, esaterako, milaka urtetan CO2 kantitate handiak metatu zituztenak.

Horren ondorioz, azken bi mendeetan, berotegi-efektua eragiten duten gas (BEG) ugari askatu ditugu atmosferara, eta aldaketa handiak eragin ditugu gure atmosferaren oreka ahulean. Gainera, oreka naturala ere aldatu egin da, eta horrek oraindik ere ikusteko gai ez garen ondorio izugarriak ekarri ditu: itsas maila handitzea, muturreko fenomeno meteorologikoak, animalia-espezieak desagertzea, lehorteak eta uholdeak, elikagaiak sortzeko arazoak, desertifikazioa, osasun-kalteak…

CO2 Emisioak Murrizteko Mundu Eguna dela eta, NBEk Lurrean bizi garen pertsonak kontzientziatu eta sentsibilizatu nahi ditu klima-aldaketaz eta horrek eragiten dituen ingurumen-inpaktuez. Gaur egun, gure planeta pixkanaka berotzen ari da giza jardueraren ondorioz. Arazo horrek pertsona guztiei eragiten die, eta arazo horren konponbidean guztiok parte hartu behar dugu.

Atmosferarako BEGen emisioak murrizten laguntzeko modu asko daude. Hasteko, jasangarritasunaren 7. printzipioak erabili ditzakegu: Berdiseinatu, Murriztu, Berrerabili, Birziklatu, Berreskuratu, Berrezi eta Bergizarteratu. Hau da, jasangarritasuna gogoan izanda eta Ekonomia Zirkularraren oinarriak aplikatuz jardutea beti. Gure joan-etorrietan garraiobide iraunkorrenak ere erabil ditzakegu, energia berriztagarriak erabili, eta gure basoak, itsasoak eta natur inguruneak kontserbatzen lagundu; izan ere, bioaniztasunari eusteaz gain, gure planetarako benetako birikak dira, atmosferako CO2 harrapatzen dituztenak

Hondakinen kudeaketak ere garrantzi handia du atmosferara isurtzen diren berotegi-efektuko gasen murrizketan. Bizkaiko 8 edukiontzi-motetako batean edo Garbiguneetan hondakin bat uzten dugun bakoitzean, kontrolik gabe botatzea eta eduki ditzakeen gasak askatzea saihesten dugu.

Halaber, lehengaiak berreskuratzen laguntzen da, hala nola beira, kartoia eta papera edo plastikoa, erauzketa- eta transformazio-prozesuetan material berriak ateratzeko eta gasak sortzeko beharra saihestuz. Gainera, edukiontzi marroira botatako hondakin organikoak birziklatzeko prozesuan energia sortzen da. Zabalgarbiko instalazioan egindako balorizazio energetikoaren bidez, etxeetarako elektrizitatea lortzen da modu garbian, erregai fosilak erabiltzea eta atmosferara gas kaltegarriak igortzea saihestuz.