Lur bakar bat daukagu. Esamolde bat dela eman daiteke, baina oraindik ere ez dugu sinesten. Izan ere, kalkuluek diote oraingo joerari eustekotan, 2050ean planetaren baliabideen hiru aldiz baliokidea kontsumituko dugula, eta % 70 hondakin gehiago sortuko ditugula. Guzti hori berotegi-efektua sortzen duten gasen igorpenen areagotzea, aldaketa klimatikoaren ondorioak, ibaien eta itsasoen kutsatzea eta biodibertsitatearen galtzea ez aipatzearren. 

Kalkuluak errazak dira. Ezin dugu “erauzi-ekoiztu-erabili-bota” dinamikan oinarritzen den Ekonomia Linealaren eredu tradizionalarekin jarraitu. Baliabideak era jasangarri batez baliatzen dituen, klimatikoki neutroa den eta, aldi berean, lehiakorra den ekonomia batera aldatu behar dugu, jasangarritasunean oinarritzen den ekonomia bat, ekoizterakoan eta kontsumitzerakoan baliabideen ustiapena arduraz kudeatzen duena. 

Gure planetaren zaintzari laguntza emateaz gain, Ekonomia Zirkularra enpresentzako aukera bat da: merkatu-hobi berriak sortzen ditu, berrikuntza sustatzen du, materialen kontsumoa murrizten du eta erantsitako balioa sortzen du. Herritarrok ere zuzenean onura aterako diogu baliabideen erabilera hobeago bati, birziklatuak, berrerabilgarriak eta birziklagarriak diren materialetatik sortutako kalitate eta segurtasun handiko, iraupen luzeagoko eta arrazoizko prezioa duten produktuei esker. Ildo honi jarraituz, Europako Batzordearen arabera, Ekonomia Zirkularrak 700.000 lanpostu sortu ditzake Europan 2030era arte.

Ekonomia Zirkularrak, denboraren, energiaren, baliabide naturalen eta hondakinen kontsumoa murriztean, ekonomia jasangarri bat bultzatzen du 7 Printzipioei esker: Birdiseinatu, Murriztu, Berrerabili, Birziklatu, Berreskuratu, Berrezi eta Birgizarteratu.

Beraz, Ekonomia Zirkularra eta, honen esku, planetarekin begirunetsua den hazkunde jasangarri bat sustatzeko era egokiena produktuak eta zerbitzuak modu eraginkorrenean sortzean datza: bere fabrikazioan baliabide natural eta energia gutxiago baliatuz, gai birziklatuak eta birziklagarriak erabiliz, bere iraunkortasuna luzatuz, eta “erabilera bakarra” eta zaharkitzea saihestuz.

Kontsumitzaileak garen heinean, gure etxeetan egiten dugunarekin ere lagundu dezakegu, kontsumo arduratsu bat burutzen, hondatzen diren produktuak konpontzen, sortu zireneko funtzioa bete dituztenak berrerabiltzen, eta bere balio-bizitza amaitzean produktuak egokiro birziklatzen. Eta, nola ez, gure inguruko pertsonak eta enpresak modu jasangarrian pentsa dezaten heziz.

Halabeharrez, zenbait gai ezin dira birziklatu eta, beraz, osatzen dituzten lehengaiak ezin dira berriz ekoizpen zikloan sartu. Hemen hondakinak beste prozesu batzuetara erabiltzean oinarritzen den Berreskuratzea sartzen da. Bizkaian Berreskuratzearen eredu argi bat edukiontzi organikoan, marroian, dugu, non landare-jatorriko janari-hondarrak, kortxo naturalak, infusio poltsatxoak… bezalako hondakin organikoak eta biodegradagarriak botatzen dira. Hondakin guzti hauek ongarri bezala erabiliko den konpost eran berreskuratzen dira.

Bizkaian Ekonomia Zirkularrerako igarotzea abian da jada, ingurumenarekin begirune handiagoa duen ekonomia batera aurrerapauso sendoak ematen ari gara.