Jasangarritasunaren garrantziaz gero eta gehiago jabetzen ari den mundu honetan, lan-ingurunean birziklatzea funtsezko premia bihurtu da, eta ezinbestekoa da baliabideen kontsumoa murrizten eta lanpostu guztietan ingurumena babesten lagunduko duten birziklatze-praktikak egitea. Denborak aurrera egin ahala, enpresa askok birziklatze-prozesuak hobetzeko ekimenak garatu dituzte, eta, horren ondorioz, langileek kontzientzia handiagoa dute ingurumena zaintzeari dagokionez.

Bulegoko lanetan gehien birzikla daitezkeen materialak papera eta kartoia dira, inprimatutako dokumentuetatik hasi eta paketatze-kaxetaraino joan daitezke; plastikoei, botilei eta janari-ontziei dagokienez, ohikoak dira, baita beirazko latak eta botilak ere.

Produktu-sorta hori guztia birziklatzea eta berrerabiltzea sustatzeko estrategiak daude:

• Birziklatze-eremu bat ipini. Bulegoan birziklatzeko gune bat antolatzeak hondakinak bereiztea errazten du. Paper, plastiko eta beste material batzuetarako edukiontzi etiketatuak jarri, eta ziurtatu langile guztiek badakitela non dauden eta nola erabiltzen diren.
• Paper birziklatua erabili. Horien erabilerak kontsumo arduratsua sustatzen du eta baliabide naturalak kontserbatzen laguntzen du.
• Edarietarako eta elikagaietarako, ontzi berrerabilgarriak erabili. Horrek, botatako plastiko-kantitatea murrizteaz gain, ohitura iraunkorragoak sustatzen ditu.
• Pilak eta bateriak berariazko edukiontzietara eraman behar dira birziklatzeko, lurzorua eta ura ez kutsatzeko. Gauza bera gertatzen da kontsumigarriekin, tonerra edo inprimatzeko tinta-kartutxoekin, adibidez. Bizkaireziklaren webgunean kontsulta dezakezu hondakin mota bakoitza non bota.
• Bulegoan ur-banagailuak jartzeak plastikozko botilen erabilera murrizten laguntzen du, ontzi propioak erabiltzea sustatuz.

Gainera, nahiz eta birziklatze estrategia baten parte ez izan, energia kontsumoa ingurumenari laguntzeko beste modu bat da. LED edo kontsumo baxuko bonbillak erabiltzeak argindarraren kontsumoa nabarmen murriztuko du, eta are gehiago argiak itzaliko balira beharrezkoak ez direnean.

Kontuan izan behar da, DBLOren arabera, informazio pertsonal sentikorrarekin tratatzen duten enpresek dokumentazio hori suntsitu egin behar dutela bilketa-kuboetan utzi aurretik. Bolumenaren arabera eta, askotan, erosotasunagatik eta segurtasunagatik, dokumentuak suntsitzen espezializatutako enpresek betetzen dute funtzio hori. Suntsitze-prozesuaren ondoren, garrantzitsua da ziurtatzea birziklatze-kanal egokiekin lan egiten dutela.

Bulegoan birziklatzea ez da lan zaila. Aldaketa txiki batzuekin eta langile bakoitzaren laguntzarekin, posible da bulegoan sortzen den hondakin-kantitatea murriztea. Bizkaian ditugun zortzi edukiontzi-moten artean, material bakoitza non uzten den kontsulta dezakezu. Ordenagailuak, inprimagailuak edo bestelako periferikoak eta osagai informatikoak uzteko, kontsultatu Garbigune-sarearen ordutegiak.