Erabiltzen ez ditugun objektuei bigarren bizitza emanez, baliabide naturalak zaintzen eta tokiko lanpostuak sortzen laguntzen dugu.

Berrerabiltzeko produktuen edukiontziak, zuri kolorekoak, Bizkaiko kaleetan zabalduta daude. Baina, zer objektu eraman ditzakegu edukiontzi horietara? Etxean txukuntzean hainbat gauza aurkituko ditugu, dagoeneko erabiltzen ez ditugun edo jada erabilgarriak ez diren ‘trasteak’, baina beste pertsona batzuek nahi izan dezaketenak. Bigarren bizitza eman diezaiekegun objektu-mota ugari.

Arropa da edukiontzi zurietan berrerabil dezakegun adibiderik argienetako bat. Etxean txikirik baldin badago, segur aski, azkar hazten diren neurrian, behin bakarrik jantzi dituzten edo estreinatu ere egin ez dituzten jantziak izango ditugu. Gauza bera gertatzen da helduen arropekin: edonork ditu modan pasatu diren arropak, edo lehen bezain ondo ematen ez dizkigutenak, edo maitasun handiz baina gustu gutxiz oparitu zizkigutenak. Erabiltzeko egoera ezin hobean dagoen arropa, arrazoi bategatik edo besteagatik probetxurik aterako ez dioguna, eta etxean armairuak betetzeko bakarrik balio diguna.

Gauza bera gertatzen da erosi genituen baina kalteak egiten zizkigutelako behin bakarrik jarri genituen zapata polit horiekin; edo irakurri ditugun eta apaletan hautsa pilatzen ari diren liburuekin; etxeko txikienak hazi egin direlako armairuen goialdean geratu diren joko eta jostailuekin; beste modelo batzuekin ordeztu ditugun mugikorrekin; edo erabiliko ez ditugun etxetresna txikiekin.

Oraindik erabilgarri diren objektu horietako edozein edukiontzi zurian edo Garbiguneen sareko berrerabilpen-etxoletan uzten denean, beste pertsona batzuen eskuetan bigarren bizitza izatera daraman prozesu bat hasten da. Kate-maila horren lehen urratsa da Koopera Gizarte Sarea, Garbikerren zerbitzu honetarako kolaboratzailea, edukiontzi horietara edo Garbiguneetara eraman ditugun tresnak eta jantziak biltzea eta Mungian daukan Berrerabiltzeko tratamendurako instalaziora eramatea.

Han, jasotako objektuen lehen sailkapena hasten da. Fase honetan, egoera onean dauden eta berrerabil daitezkeen produktuak, alde batetik, eta berrerabili ezin direnak, bestetik, bereizi egiten dira. Azken hauek bere osagaien motaren arabera (plastikoa, papera, metala, etab.) birziklatu egiten dira, materialak aprobetxatzeko. Berreskuratutako material horiek ekoizpen-zikloan sartuko dira berriro.

Lehen bahetze hori gainditutakoan, berriz sailkatzen dira berrerabil daitezkeen objektuak, oraingoan, bere funtzioa kontuan hartuta (ehungintza, papera, etxetresna elektriko txikiak, etab.). Garbitu eta higienizatu egiten dira, bere funtzioa behar bezala betetzen dutela egiaztatzen da, eta etiketatu egiten dira, Kooperako bidezko merkataritzako denda-sarera eramateko. Han, oso prezio eskuragarrietan jartzen dira salgai, gure etxeetan bigarren bizitza emango diegun zain.

Berrerabilitako produktu horiei esker, hondakinak minimizatzen ditugu, baliabide naturalak eta energetikoak alferrik galtzea saihesten dugu, berriak eginez sortzen den kutsadura murrizten dugu, eta ekonomia zirkularra, tokiko enplegua sortzea eta bazterketa-arriskuan dauden pertsonak gizarteratzea bultzatzen dugu. Hori guztia, besterik gabe, erabiltzen ez duguna berrerabiltzeko edukiontzira botaz.