Produktuak ontzi berrerabilgarrietan erosten ditugunean, ingurumenaren jasangarritasuna bultzatzen ari gara

Argazkiz betetako kartoizko kaxak, josteko tresnak gordetzeko gaileta edo kafe latak, iturriko ura fresko mantentzen zuten beirazko botilak, erosketak egitera joateko oihalezko poltsak, etxean sobratzen ziren saltsak gordetzeko maionesazko poteak... Ohitura horiek, garai batean edozein etxetan hain ohikoak zirenak, desagertu egin dira azken hamarkadetan.

Modernitatearen eta erosotasunaren mesedetan, erabilera bakarreko ontzietako produktuek, bereziki plastikoz egindakoak, ohiko ontzi berrerabilgarriak ordezkatu dituzte, eta ingurumen- eta osasun-arazo larriak eragin dituzte: baliabide naturalen kontsumoa, hondakin kutsatzaileak, energia xahutzea…

Planetaren osasunari eusteko egiten den ekintza bakoitzak bere garrantzia du. Funtsezkoa da gure ohiturak aldatzea eta kontsumo arduratsua egitea, eta alde horretatik, gure etxeetan ontzi berrerabilgarriak erabiltzeko ohitura hartzeak dakartzan abantailak oso nabarmenak dira:

- Ez dugu ontzi berririk erosi behar; beraz, lehengai gutxiago atera behar da eta ez da energia alferrik erabili behar ontzi berriak egin eta garraiatzeko, baliabide naturalak zaintzen lagunduz.

- Ontzi bat berrerabiltzen dugun bakoitzean, haren balio-bizitza luzatzen dugu; beraz, murriztu egiten da ingurumenean izango duen eragina, murriztu egiten baitira gure etxeetan sortzen ditugun hondakinak eta horiek sor dezaketen kutsadura.

- Ontzi berrerabilgarri nagusiak, era berean, birziklagarriak izaten dira. Hori dela eta, zabortegietan hondakin gutxiago pilatzen da eta gure ingurune naturalen kutsadura murrizten da, bereziki itsasoetako plastikoena.

- Ingurumena zaintzeaz gain, ontzi berrerabilgarriak erabiltzeak aurrezpen ekonomiko handia dakar kontsumitzaile gisa; izan ere, ontzi bera hainbat aldiz erabiltzean, beste batzuk erosteko beharra murrizten dugu, janaria hobeto aprobetxatzen dugu eta solteko produktuen biltegiratzea errazten dugu, behar ez ditugun ontziak erostea saihestuz.

Era askotan erabil ditzakegu ontzi berrerabilgarriak, produktu berriak erosi beharrik gabe eta gure planetaren jasangarritasunean lagunduz:

- Usainik eta zaporerik transmititzen ez dutenak, hala nola beirazko botilak eta poteak edo altzairu herdoilgaitzezko latak, ezin hobeak dira elikagaiak kontserbatzeko, eta, beraz, etxean prestatzen dugun janariaren soberakinak aprobetxatzen laguntzen digute, elikagaiak xahutzea saihestuz.

- Itxitura estankoak badituzte, likidoak ihes egiteko arriskurik gabe kontserbatzeko eta garraiatzeko balio diezagukete, baita nahi den tenperaturan gordetzeko ere, erabilera bakarreko ontziak baino denbora gehiagoz.

- Oihalezko poltsak plastikozkoak bezain praktikoak dira, eta erosketak egitera goazenean erabiltzen baditugu, ez ditugu kutsagarriak izan daitezkeen plastikoak erosi behar.

- Biltegi gisa erabil ditzakegu, gure etxeak eta gauzak hobeto ordenatuta edukita eta hondatu ditzaketen hauts, argi edo hezetasunetik urrun.

- Edarietako aluminio-latak edo jasotzen ditugun bidalketetako kartoia oso material onak dira eskulanak egiteko.