Gaur, Bizkaiko Foru Aldundiak 2025ean antolatutako bigarren topaketa egin da jasangarritasunaren eta ekonomia zirkularraren arloko ikerketa, berrikuntza eta lankidetzako erreferentzia-zentroa den Waste Lab Bizkaian, Bizkaiko lurralde historikoko toki-erakundeei zuzenduta.

Jardunaldian, gakoak azaldu dira hondakinak modu eraginkorrean biltzeko eredu bat ezartzeko, baita hainbat udalerrik egindako jardunbide egokien adibideak eman ere.

Hala, hondakinak biltzeko hainbat eredu aurkeztu dira, denak eraginkorrak gaikako bilketaren eta baliabideen optimizazioaren tasak hobetzeko. Arreta berezia jarri da erabiltzaileen identifikazioa duten edukiontzi itxietan.

Tokiko esperientzien datu zehatzak partekatu dira, bilketa-eredua aldatzeak eta herritarren kontzientzia handitzeak hobekuntza esanguratsuak ekar ditzakeela erakusteko: behar bezala bereizitako zati organikoa handitzea eta hondakinen nahasketa murriztea.

Argi geratu da, eredua arrakastatsua izan dadin, herritarrak inplikatu behar direla. Informazio argia, entzute aktiboa eta kontzientziazio-kanpainak funtsezkoak dira ohiturak aldatu eta praktika jasangarriagoak izateko.

Gehien eztabaidatu zen gaietako bat izan da txartel edo app bidez erabil daitezkeen edukiontzi itxiak ezartzea. Neurri horrek aukera ematen du trazabilitatea hobetzeko, edukiontzien erabilera okerra murrizteko eta norbanakoaren erantzukizuna sustatzeko.

Sistemaren kontrolak eta jarraipenak duten garrantzia nabarmendu da. Datuak ikuskatzea eta aztertzea funtsezko tresnak dira desbideratzeak detektatzeko, portaerak zuzentzeko eta ereduak behar bezala funtzionatzen duela bermatzeko.

Toki-erakundeekin kontrastatzeko eta eztabaidatzeko dinamiken barruan sartuta dago topaketa, eta Bizkaiko Foru Aldundiak 2025. urte hasieran abian jarritako ekimen bat da.