Gure herri eta hirietan zehar egunero mugitzen gara. Lanera, zinemara, antzerkira edo kontzertu batera joateko mugitzen gara; familiarekin eta lagunekin topo egiteko; baita asteburuko ihesaldi bat egiteko edo oporretan joateko. Hiri-mugikortasuna gure edozein udalerritan milaka joan-etorri batzen dituen gizarte-premia da.

Joan-etorri horiek egiteko ibilgailu pribatuaren erabilera hedatu eta sustatu egin da, gure herriek eta hiriek dituzten arazo larrienetako batzuk sortuz: kutsadura atmosferikoa eta akustikoa, osasunerako ondorioak, hiri-eremuaren okupazioa, auto-ilarak eta energia-baliabideen xahutzea. Zenbait tokitan, hirigintzak eta hiri-garraiobide nagusi gisa autoari eman zaion lehentasunak gidatzen ez duten edo ibilgailurik ez duten pertsonek beren herrietan benetako mugikortasun-arazoak izatea eragin dute.

Mugikortasun jasangarria autoaren erabileran oinarritutako mugikortasun-ereduaren ondorio negatiboak murrizteko, eta are ezabatzeko ere, ekintza-multzo bat biltzen duen estrategia da. Halaber, pertsonak segurtasunez eta gizarte-, ingurumen- eta ekonomia-kostu txikiagoarekin mugitzeko garraio-aukera desberdinak eskaintzen dituen sistema defendatzen du.

Hiriak, autoan oinarritutako mugikortasun-politikek gehien kaltetzen dituzten tokiak, mugikortasun iraunkorraren protagonista bihurtzen ari dira, eta mugitzeko modu iraunkorragoen eta hiri-inguruneetan bizi diren pertsonen bizi-kalitatearen hobekuntzan zuzenean eragiten duen garraio-eredu eraginkor eta irisgarriaren alde egiten dute.

Horrela, autoek isurtzen dituzten gas toxikoak murriztean, pertsonen osasuna hobetzeaz gain, kutsadura akustikoa ere murrizten da. Eta, batez ere, erregai fosilen kontsumoan aurrezten da, eta horrek klima-aldaketaren aurkako borrokan laguntzen du. Era berean, orain arte ibilgailuen zirkulaziorako edo aparkalekurako gordetako lekua ere herritarren erabilerarako berreskuratu ahal izango du hiriak.

Mugikortasun iraunkorrago baterako aholkuak

- Ahal den guztietan ibiltzea. Joan-etorriak oinez egin behar ditugu. Zalantzarik gabe, hirian mugitzeko modurik merkeena, iraunkorrena, eta osasungarriena ere, da.

- Bizikletaz joatea. Joan-etorri luzeagoak edo presazkoagoak egiteko, bizikleta beti da aukera ona. Bizkaian gero eta bizikleta-bide eta bidegorri gehiago ditugu, energia-baliabideak kontsumitu gabe modu seguruan mugitzeko

- Garraio publikoa erabiltzea. Bizkaiak garraio publikoko sare zabala du, Lurralde Historikoko ia edozein txokotara azkar eta eraginkortasunez hurbiltzen gaituena: Bizkaibus, Bilbobus eta hiri- eta hiriarteko beste autobus batzuk; Metro Bilbao, Euskotren, Renfe, Feve eta Tranbia lineak; funikularrak eta igogailuak; baita Gizateriaren Ondarea den Bizkaia Zubia ere!