Umeen Gabonetako Parkea (UGP) abenduaren 18an irekiko da Barakaldoko BEC-en, iraunkortasuna entretenimendu eta ikaskuntza ardatz nagusitzat hartuta. ‘Dibertsioa baloreekin' goiburupean, parkea urtarrilaren 5era arte egongo da zabalik, eta kirol, jolas eta bestelako atrakzioez gozatzeko aukera emango die txiki eta nagusiei.

Garbiker parkean izango da aurten ere hondakinen kudeaketa eta kontsumo arduratsua sustatzeko eta zabaltzeko helburuarekin. 55. edizio honetan, 100 m² -ko standa izango du, eta foru erakundeko Iraunkortasuna eta Ingurune Naturala Zaintzeko Sailaren laguntzarekin, hainbat jarduera, dinamika eta tailer eskainiko ditu.

Eskaintza zabal eta oparoarekin, 5 urtetik gorako haurrei zein helduei zuzendutakoa. Garbikerren standak familia plan dibertigarriaz gozatzeko aukera ezin hobea eskaintzen du. Bertan aurki daitezkeen dinamikak honako hauek dira:

· Birziklapen Twisterra: Twister zoru joko klasikoa hondakin bakoitza dagokion edukiontziaren kolorearekin modu egokian erlazionatzen ikasteko dinamika bihurtuko da.

· Planeta konpondu. Hondakinak kudeatzeko hierarkia ("6 R" izenaz ezagutzen dena) sustatu eta ezagutarazteko, R horietako bakoitza planeta kutsatu batera jaurtitzean datza joko hau, gero praktikan jartzeko eta, horrela, planeta garbitzea lortzeko.

· Gaikako bilketa. Gure planeta garbi mantentzea gure esku dago eta, horretarako, funtsezkoa da hondakinak gaika biltzea eta modu eraginkorrean egitea. Joko honetan hondakin bakoitza dagokion edukiontzian saskiratu beharra dago. Hondakinen edukiontziak kolore ezberdinekoak izango dira, eta horien artean beste edukiontzi gris batzuk egongo dira, gaikako bilketa gauzatzea zailago bihurtuko dutenak.

· Herri kirolak. Astebetean zenbat zabor sortzen duzun jakin nahi duzu? Edo hilabete baten buruan? Batez ere helduei zuzendutako dinamika honek, herri kirolez gozatu bitartean egunero sortzen dugun zabor kantitateari buruz hausnartzeko bidea irekitzea du xede.

· Turukutupa taldearen kontzertuak, berebiziko ikuskizunen sinonimo. Abenduaren 22ko arratsaldean eta urtarrilaren 2ko goizean, kontzertu bikaina ikusteko aukera izango dute bertaratzen direnek. Gainera, bertako material akustiko guztia eta eszenografia objektuak hondakinak berrerabiltzetik eta birziklatzetik datoz.

Ekosistema zaintzea guztion ardura da, txiki eta helduena. Horregatik, ohi bezala, birziklatzeko edukiontziak izango dira azoka guztitik. Zalantzarik gabe, iraunkortasuna eta, ondorioz, birziklapena gizarte eta ingurumen-erantzukizunaren oinarriak dira. Garbikerrek, beste behin ere, Umeen Gabonetako Parkean parte hartuko du familiako kide guztientzako eguneroko ekintzak, praktikak eta jarduerak ezagutzera emateko,  planetaren kutsadura txikiagotu eta geldiarazteko helburuarekin. Ikaskuntza, dibertsioa eta ingurumena eskutik doaz!