Eduki publikatzailea

Garbikerrek bere hezkuntza-eskaintza zabaldu du Lehen Hezkuntzako ikasleei zuzendutako dibulgazio-bisita berri batekin

2026/11/04

Garbikerrek bere hezkuntza-proposamena zabaldu du, Bizkaiko ikastetxeetako Lehen Hezkuntzako ikasleentzat diseinatutako bisita gidatuen modalitate berri bat abian jarrita, oraingo honetan Zamudio/Derioko Parke Teknologikoan, Artigaseko egungo eskaintza osatzen dutenak. Ekimen honek beste urrats bat dakar zentroak ingurumen-sentsibilizazioarekin eta hondakinen prebentzioaren eta kudeaketaren arloko hezkuntzarekin duen konpromisoan.

Orain arte, Waste Lab Bizkaia Parkean antolatutako bisita gidatuak, batez ere, Bigarren Hezkuntzako, Batxilergoko, Lanbide Heziketako eta unibertsitateko ikasleei zuzenduta zeuden. Proposamen berri honekin, zentroak hartzaileak zabaldu ditu, eta edukiak, jarduerak eta dinamikak egokitu ditu Lehen Hezkuntzako haurrentzat esperientzia hurbilagoa, parte-hartzaileagoa eta erakargarriagoa eskaintzeko.

Horretarako, bisitaren kontakizuna berrikusi eta egokitu da, eta baliabide eta jarduera berriak txertatu dira, hondakinekin, ekonomia zirkularrarekin eta jasangarritasunarekin lotutako kontzeptuak jokoaren, esperimentazioaren eta sormenaren bidez lantzeko.

Berrikuntza nagusien artean, “Hondakinak Jokoan” dinamika nabarmentzen da. Telebistako lehiaketetan inspiratutako jarduera da, eta bertan, ikasleek hondakinen munduarekin lotutako hainbat proba eta erronka gainditu beharko dituzte. Proposamen honen bidez, ikaskuntza modu ludiko, dinamiko eta elkarlanekoan sustatu nahi da, ikasleak beren esperientziaren protagonista bihurtuz.

Bisitan, Materialen Liburutegiko dinamikaz gain, beste jarduera berri bat ere txertatu da: “Hondakinen Laborategia”. Espazio horretan, ikasleek hainbat prozesu eta fenomeno ezagutzeko aukera izango dute, biometanizazioarekin, uraren kutsadurarekin, dentsitateekin eta magnetismoarekin lotutako esperimentu praktikoak eginez. Horrela, hondakinen kudeaketarekin eta balorizazioarekin lotutako prozesu batzuk ikuspegi esperimental batetik ezagutu eta ulertu ahal izango dituzte.

Beste berrikuntzetako bat “Sormen-tailerra” da. Espazio horretan, hondakinak artearen eta diseinuaren ikuspegitik landuko dira. Sormen-jardueren bidez, hainbat material berrerabiltzeko eta eraldatzeko aukerak erakutsi nahi dira, material horiek baliabide gisa duten potentziala nabarmenduz eta normalean hondakintzat jotzen dugunari beste modu batera begiratzeko aukera emanez.

Proposamen berri honekin, Garbikerrek dibulgazioaren eta ingurumen-hezkuntzaren arloko bere erreferentziazko eginkizuna indartzen du, lurraldeko hezkuntza-komunitateari ikasteko eta sentsibilizatzeko aukera berriak eskainiz. Helburua, gazteenek, txikitatik, hondakinen sorrera prebenitzearen, baliabideak hobeto aprobetxatzearen eta kontsumo eta ekoizpen-eredu jasangarriagoetarantz aurrera egitearen garrantziaz kontzientzia handiagoa hartzea da.