Garbikerren ordezkaritza batek azken teknologiaz hornitutako hiri-hondakinak sailkatzeko eta balioztatzeko instalazioak bisitatu ditu

Garbiker, Bizkaian sortutako hiri-hondakinak tratatzeaz eta kudeatzeaz arduratzen den enpresa publikoa, Bizkaiko Zabor Berziklategia - BZBko bazkide alemanak eta ingurumen-zerbitzuen hornitzaile globalak den Trienekensen arduradunak lagunduta, Alemanian hainbat instalazio bisitatu ditu urrian, etorkizunean ezar daitezkeen teknologia berrien erabilera lehen pertsonan behatu eta aztertzeko, Lurralde Historikoko instalazio eta azpiegituretan eraginkortasun eta ingurumen-errendimendu handiko ereduak lortzeko

Garbikerren ordezkaritzak hondakinak sailkatzeko plantetarako makinen fabrikazioan munduko liderra den TOMRA Sorting Systems-en ‘Future Lab’ instalazioa bisitatu du lehenik. Han, ontziak sailkatzeko makina modernoenen ezaugarriak eta funtzionamendua ikusi ahal izan dituzte. Makina horiek enpresak garatutako sentsoreetan oinarritzen dira, partikula-erresoluzioa eta -detekzioa hobetzeko eta, hala, purutasun handiagoko frakzioak erauzteko, gero materialak bereizteko.

Bisita horretan, fabrikatzaileek ontzien garapenean dituzten joera orokorrak aztertu dira, baita ontzi-hondakinak detektatzeko azken teknologiak ere, hala nola trazatzaileetan oinarritutako sailkapena edo Procter & Gamble buru duen holygrail proiektua, ontziei marka digitalak eransteko. Metodo eta makina horiei esker, nabarmen optimizatuko dira birziklatze-eragiketak eta baliabideak berreskuratzea.

Ondoren, ordezkaritzak Kolonia eskualdea bisitatu du, baita VZEK Erftstadt ekoparkeko instalazioak ere. Fabrika horiek ontzi arinak sailkatzeko instalazio bat du, urtean 120.000 tona tratatzeko gaitasuna duena, eta punta-puntako teknologiak ditu hiri-hondakinak azpiproduktuen familia berrietan bereizteko. Horri esker, material berriak errazago tratatu eta birziklatzen dira.

Tratamendu Mekaniko Biologikoko (TMB) Instalazioak nola funtzionatzen duen ere ikusi ahal izan dute. Urtean 180.000 tona trata ditzake, eta produktu birziklagarria eta irteerako CSR prozesatzeko eta merkaturatzeko ratio altuenak lortu dituzte.

Bisita horiei esker, Garbikerren ordezkariek ezagutzak eta esperientziak trukatu dituzte sektoreko beste erakunde eta enpresa batzuekin, berrikuntzan aurrera egiteko eta, hala, Bizkaiko hiri-hondakinen kudeaketa eraginkorragoa eta jasangarriagoa lortzeko.