Gako erraz batzuek Gabon iraunkorragoak lortzen lagun dezakete

Ospakizunentzako, oparientzako eta Gabonen apaingarrientzako garaia da. Baina, era berean, gehien kontsumitzen den urteko sasoia ere da, eta kontuan hartu behar dira Gabonetako gehiegikeriek gure ingurune naturalean izan ditzaketen ondorioak. Arduragabekeriaz jokatzen badugu, eta jasangarritasuna gogoan izateari uzten badiogu, Gabonetako festek nabarmen areagotu dezakete lehengaien, baliabide naturalen eta energia elektrikoaren kontsumoa, eta, aldi berean, nabarmen handitzen dituzte gure etxean sortzen ditugun hondakinak.

Aholku txiki batzuei eta iraunkortasunaren 7 printzipioek ezartzen dituzten jarraibideei jarraituz, gure etxeetan Eguberriek ingurumenean sortzen dituzten inpaktu negatiboak murriztu ditzakegu.

Adibidez, Gabonetan nabarmen handitzen den gure elektrizitate-kontsumoa murriztu dezakegu, etxean ez gaudenean edo ohera joaten garenean gure etxeetako Gabonetako argiak itzaliz. Eguberrietako zuhaitzak apaintzen dituzten argietako kontsumo txikiko bonbillak edo ledak ere erabil ditzakegu. Konbentzionalek baino askoz elektrizitate gutxiago kontsumitzen dute, eta ez dute berorik sortzen; beraz, askoz ere seguruagoak dira, eta balio-bizitza luzeagoa dute.

Halaber, energia aurreztu dezakegu modu eraginkorrean janaria prestatzean, labeetako hondar-beroaz baliatuz platerak bero mantentzeko, presio-eltzea erabiliz eta kazola eta zartaginak tapatuz, beroa hobeto aprobetxatzeko eta janariak azkarrago prestatzeko. Hozkailuek eta izozkailuek ere gehiago kontsumitzen dute egun hauetan; beraz, garrantzitsua da oraindik bero dauden elikagaiak ez sartzea, energia-gastua ez handitzeko. Eta janaria zerbitzatzeko orduan, hobe da mahaia prestatzeko ohiko baxera berrerabilgarria erabiltzea, eta erretiluak, mahai-tresnak, platerak edo plastikozko edalontziak saihestea, batez ere erabilera bakarrekoak, hondakinak sortzen baitituzte, eta horietako batzuk ezin dira birziklatu beren ezaugarriengatik.

Eguberrietako bazkari eta afarietarako elikagaiak erostean, gure erosketak planifikatu egin behar ditugu, eta elikagaiak alferrik ez gastatzen saiatu, janaria zaborretara ez iristeko. Erabili ez ditugun osagaiak edo kontsumitu ez diren elikagaiak geroago jateko izoztea aukera ona da. Halaber, tokiko eta denboraldiko produktuen alde egin behar da, horien garraioak ingurumenean eragin txikiagoa izan ohi baitu.

Gabonetako opariak egiteko orduan ere gogoan izan behar dugu jasangarritasuna. Adibidez, trebetasun eta pazientzia pixka batekin, etxean ditugun materialekin norberak egindako opariak egin ditzakegu. Eta opariak erosi behar baditugu, komeni da material iraunkorrekin, birziklatuekin eta birziklagarriekin egindakoak aukeratzea, eta pilak edo bateriak behar dituzten jostailuak ez erosten saiatzea.

Opariak biltzeko erabiltzen ditugun paperak ere ingurumen-arazo bat izan daitezke. Horietako asko plastifikatuta daude dirdira egiteko; beraz, ezin dira birziklatu. Aldiz, beste ospakizun batzuetako paperak berrerabil ditzakegu, baita gure oparietarako bilgarri ikusgarriak sortu ere, dagoeneko erabili ezin ditugun oihalezko oihalkietaz baliatuz. Hala, urtero Gabonetan opira-paperrak sortzen dituen hondakinak murriztuko ditugu.

Eta, azkenik, ez da ahaztu behar ezen, produktu bat dagoeneko ezin bada aprobetxatu eta haren bizi-zikloa amaitu bada, ingurumenerako onena dela zer hondakin-mota den kontuan hartuta bereiztea, eta Bizkaian ditugun zortzi edukiontzi-mota egokian uztea, edo Garbiguneetara eta Garbigune mugikorretara eramatea. Hondakin bat non utzi behar den zalantzarik izanez gero, Bizkaireziklara jo dezakegu beti, hondakin-mota bakoitzarekin zer egin behar den jakiteko.

Planetaren osasuna zaintzeko aholku txiki hauei jaramon eginez gero, Gabonak jasangarriak eta ingurumena errespetatzen dutenak izatea lortuko dugu.