Konpostatzea, gaur egun, funtsezko tresna da hondakinak aprobetxatzeko eta lurzorua era naturalean ongarritzeko. Bizkaian, Garbikerrek kudeatutako Bizkaiko Konpostegiaren instalazioek kalitate handiko konposta eratzen dute, Bizkaiko udalerrietan bildutako materia organikoa eraldatuz.

Lehenbiziko lana lurraldean inausitakoa jasotzea eta, ondoren, birrintzea da, egituratzailea lortzeko. Beste alde batetik, edukiontzi marroiko frakzio organikoa jasotzen da. Bertan uzten dira janari-hondarrak, bai animalia-jatorrikoak (okela eta arraina, itsaskien oskolak eta maskorrak, gazta, arrautza-oskolak) bai landare-jatorrikoak (barazkiak, frutak, haziak, fruitu lehorrak eta haien oskolak, zerealak, landare-hondarrak). Une horretan, gai desegokiak bilatu eta bereizten dira, hala nola plastikoak eta beste material ez-konpostagarri batzuk, prozesuaren hurrengo fasera igaroko den materialaren ezaugarriak bermatzeko xedez. 

Ondoren, material organikoa egituratzailearekin nahasten da, materialak une bakoitzean duen egoeraren araberako proportzio egokian, eta, hala, karbonoaren eta nitrogenoaren arteko erlazioa behar bezalakoa dela ziurtatzen da, deskonposizioa errazteko. 

Nahastea egindakoan, materiala hartzidura-tuneletan sartzen da, eta lau astez dago han, konpostatze-prozesua azkartzeko. Aldi hori igarota, materiala heltze-eremura eramaten da, eta hor, beste lau astez, eraldatzen jarraitzen du, etengabeko kontrolpean.

Prozesuaren azken etapa bahetzea da: partikularik lodienak bereizi eta A klaseko konposta lortzen da, kalitate handiko ongarritzat katalogatuta dagoena.

Konpost hori salgai jartzen da Bizkaiko Konpostegian, hainbat erabileratarako, bai udalentzat eta lorezaintza-enpresentzat, bai partikularrentzat. Konposta ontziratu gabe merkaturatzen da, eta bezeroa bera arduratzen da hura garraiatzeaz.