Pertsona askok eguneroko ohitura bihurtu dute birziklatzea. Baina oraindik daude, gaur egun ere, birziklatzeari buruzko informazio okerrak edota gezur hutsak aitzakiatzat jartzen dituztenak ekintza erraz hau ez burutzeko.

Hauek dira birziklatzeari buruzko mito faltsu ohikoenak:

1. “Amaieran, guztia kamioi berberetan batzen dute”

Bilketa-kamioiek bere barruan hondakin mota guztiak nahasten eta gero dena batera toki berean botatzen dutelako uste okerra dago.

Egia esan, dauden zortzi edukiontzi motetan, hala nola Lurralde Historikoan sakabanatutako 23 Garbiguneetan eta Bilboko 4 Bilbogarbietan uzten den hondakin mota ezberdin bakoitza biltzeko berezitutako kamioiak erabiltzen dira. 

Bizkaian hondakinen bilketa gaika egiten da, eta hondakin mota bakoitza bere tratamendurako eta birziklatzerako dagokion instalaziora garraiatzen da. 

2. “Ez dakit non birziklatu, dena zaborrera”

Batzuetan, etxeetan sortzen diren hondakin batzuk non utzi behar diren zalantza sortzen denean, horiek errefusaren edukiontzian bukatzen dira, berrerabili edo birziklatu ezin diren hondakinekin batera.

Honelako egoeretan sortzen diren galderei erantzuna emateko, BizkaiReziklak hondakin mota bakoitza birziklatzeko era eta leku egokiena aurkitzea ahalbidetzen duen aplikazio bat dauka, lana erosoagoa egiteko bilatzaile bat duena.

BizkaiReziklaren bilatzailea Garbikerren webgunean dago eskuragarri.

3. “Etxean ez daukat hondakinak bereizteko lekurik”

Pertsona batzuek bere etxean duten lekuaren aitzakia erabiltzen dute hondakin birziklagarriak ez bereizteko.

Kontua da etxeko hondakinek leku bera betetzen dutela, birziklatzeko banandu ala ez. Gainera, ez da beharrezkoa hauek etxean pilatzea, etxeko hondakinak dagokien edukiontzietan aldizka bota daitezke. Nolanahi ere, etxean dugun lekura moldatzen diren birziklatzerako ontziak badira.

4. “Geroago bereiziko dute”

Errefusaren edukiontzietan uzten diren hondakinek, tratamendu mekaniko-biologiakorako (TMB) instalazio batean tratatzen badira, birziklagarriak diren materialak berreskuratzeko prozesu bat igarotzen dute, baina beste hondakin motekin nahasten badira bere sailkaketa eta bereizketa zailagoa bilakatzen da. Batzuetan materialak hondatu egiten dira, bere birziklatzea trabatuz edota eragotziz.

Horregatik, ezinbestekoa da hondakin mota bakoitza dagokion edukiontzian uztea, udalerri bakoitzaren udal-bilketa zerbitzuak erabiltzea, edo Garbigune mugikorretan edo Bizkaiko Garbiguneen sarean uztea. 

5. “Birziklatzen badut lanpostuak galtzen dira”

Aitzitik, birziklatzeak lan zuzena eta ez zuzena sortzen du, batez ere tokiko ekonomian. Birziklatzeak ekonomia zirkularraren zikloan elkarrekin lan egiten duten eremu ezberdinetako hainbat langileen beharra du: materialak biltzeko, hondakinen kudeaketa egiteko, bere sailkaketa eta berreskuratzea burutzeko eta produktu berriak sortuko dituzten lehengaiak zirkulazioan jartzeko.

6. “Birziklatzea garestia da”

Birziklatzearen onurek lehengai bat objektu bat bihurtzeko inbertitutakoa soberan gainditzen dute. Hondakinen birziklatzeari esker ur- eta energia-kantitate nabarmenak aurrezten dira, hala nola lehengai berrien erauzketa, ekoizpen guneetara garraioa, edo produktuen bizitza baliagarriaren amaieran sortzen dituzten kudeaketa gastuak. 

Aurrezte hauei, eta birziklatzeari esker, CO2-ren eta beste gas kaltegarrien atmosferara isurpenak murrizten direla; airearen, uraren eta itsasoen kutsadura txikiagoa sortzen dela; ingurumena eta baliabide naturalak zaintzen direla; eta tokiko lana sortzen dela gehitzen bazaie, EZ birziklatzea da garestia dena.

7. “Berdin dio nik birziklatzen ez badut…”

Pertsona bakoitzak hondakinak sortzen ditu egunero. Zehazki, Bizkaian etxe bakoitzak edukiontzietan kilo bat hondakin uzten du egun eta pertsona bakoitzeko.

Hau dela eta, guztiz beharrezkoa da guztiok, hondakinen sorreraren eta honek dakarren kutsaduraren erantzule garen heinean, energia aurrezteko, baliabide naturalak zaintzeko, produktu berriak ekoizteko, lanpostuak sortzeko eta ingurumena babesteko irtenbidearen parte izatea eta hondakinen kudeaketa egokian elkarlana egitea.