Inoiz galdetu al diozu zeure buruari zer esan nahi duten ontzi eta produktu ezberdinek inprimatuta daramatzaten sinboloek? Horien guztien helburua bera da: birziklatzearen onurei buruzko kontzientzia sortzea. Horregatik, sinboloen esanahia ikastea birziklapenean pauso bat gehiago ematea da, kontsumitutako produktuei, birziklatzeko moduari eta hauen jatorriari buruz gehiago ezagutzea.

1. Birziklatze-sinboloa

Birziklapenaren lehen sinboloa 1970ean sortu zen eta hau da sinbolorik ezagunena. Birziklapenaren jatorrizko ikurra da, eta horren esanahia erraz ondoriozta daiteke: Berrerabili, Murriztu eta Birziklatu. Sinbolo hau produktu edo ontziren batean agertzen denean, birziklagarriak diren materialez egina dagoela esan nahi du. Gainera, eraztunak ehuneko bat badu erdian, % hori birziklagarria dela esan nahi du.

2. Ontzien puntu berdea

Sinbolo hau produkturen batean egoteak fabrikatzen duen enpresa Kudeaketa Sistema Integratuari (KSI) atxikita dagoela esan nahi du eta, beraz, Ontzien Legea betetzen duela. Hau da, ontziratze-enpresak beren produktuak birziklatzeaz arduratzen direla bermatzen du. Normalean, metalezko ontzietan, tetrabriketan edo plastikoz, kartoiz edo beiraz egindako ontzietan aurkitzen da.

3. ‘Tidyman’ sinboloa

Sinbolo honek erantzukizunari dei egitea du xede. Berau duen produktua leku egoki batean utzi behar dela adierazten du. Beraz, kontsumitzaileak berak jakin behar du zein edukiontzitan bota behar den hondakina. Orokorrean, kartoizko kaxek edo ontziek izaten dute sinbolo hau.

4. Plastikoentzako zazpi sinboloak

Plastiko-mota asko daudenez eta hauen materialak oso konplexuak direnez, plastikoek zazpi sinbolo-mota dituzte, birziklatze-triangeluez eta 1etik 7ra bitartera doazen zenbakiez irudikatuak. Hala, plastikozko ontzi bakoitzak bere birziklatze-sinboloa du, zer plastiko motatakoa den adierazteko eta gomendatutako erabilerak ezagutzeko.

- 1 zenbakia, PETE edo PETari (Polietileno-tereftalatoa), freskagarri- botiletarako eta elikagaien ontzietarako erabiltzen da normalean.

- 2 zenbakia, HDPEa (Dentsitate handiko polietilenoa), garbiketa-produktuetan aurkituko duzu gehienbat.

- 3 zenbakia, PVCa (Polibinil kloruroa), oso material gogorra da, eta etxean olio, garbigarri edo xanpu botiletan erabiltzen da. Etxeko erabileratik kanpo, eraikuntza-materialetan, leihoetan, hodietan eta abarretan erabiltzen da.

- 4 zenbakia, LDPEa (Dentsitate txikiko polietilenoa), denda eta supermerkatuetako poltsetan erabiltzen da batez ere.

- 5 zenbakia, PPa (Polipropilenoa), jogurtetan, medikuntza-ontzietan edo edari-lastoetan aurkituko duzu, besteak beste.

- 6 zenbakia, PSa (Poliestirenoa), janaria mantentzeko erabiltzen da, eta sarria erabiltzen da elikagai erretiluetan edo arrautza-ontzietan.

- Azkenik, 7 zenbakia katalogatu gabeko plastikoei dagokie. Eguzkitako betaurrekoetan edo DVDetan aurkitu ohi da.

5. Beiraren birziklatzea

Sinbolo hau beirazko botiletan aurki ohi da. Bere esanahia: produktua beirazko edukiontzian utzi behar dela, birziklatu ahal den produktua baita.

6. Hondakin elektronikoak

Beiraren birziklapenerako aurreko sinboloak ez bezala, objekturen batean paperontzi marratu batek irudikatutako hondakin elektronikoetarako sinbolo hau ikusten baduzu, horrek esan nahi du ez dela zaborretara bota behar. Objektu hauek Garbigunera edo Garbigune mugikorrera eraman behar dira, edo berrerabiltzeko edukiontzian utzi. Era berean, kontuan izan etxetresna elektrikoen dendek etxetik jasotzen dituztela tresna elektriko zaharrak, baldin eta xede bererako tresnak erosten badira bertan.