Birziklatzeko laguntza behar duzu? Lau erreminta hauen bidez, hondakin mota jakin batzuk birziklatzeko moduari buruzko zalantzak argitu ahalko dituzu, informazio praktikoa eskuratu, edukiontziak eta gertuko garbiguneak aurkitu eta zure egunerokoan birziklatzea erraztuko dizuten gakoak ezagutu.

1. Garbikerren BizkaiRezikla. Garbikerren BizkaiRezikla atalak etxeko hondakinen kudeaketa hobetzea du helburu. Horretarako, webguneak hondakinen, artikuluen, objektuen eta abarren bilatzaile zabala du, hauek non utzi behar diren xehetasunez argitzeko, eta hondakinak ez birziklatzeak zer arrisku eta inpaktu sortzen dituen, eta, aitzitik, hauen kudeaketa onak dakartzan onurak azaltzeko. Eta hori ez da dena. Erremintak mapa bat ere badu, udalerrietan kolore bakoitzeko zenbat edukiontzi dauden erakusteko.

BizkaiRezikla ez dago mugikorreko aplikazio gisa, baina eskuragarri dago Garbikerren wegbunetik.

2. Ecoembeseko A.I.R-e birziklatze-laguntzaile adimenduna. Edukiontzi horian eta urdinean birziklatzera bideratuta, Ecoembes hondakinen kudeatzaile integratuak ontzi bakoitza zein edukiontzitan utzi behar den argitzen laguntzeko aplikazioa du. Aplikazioa adimen artifizialaz elikatzen da, eta oso erraza da haren funtzionamendua, denbora errealeko elkarrizketak eskaintzen baititu chatboxaren bidez: testuen, ahots-mezuen edota argazkien bidez galderak bidaliz, txatak unean uneko erantzunak itzultzen ditu kontsultatutako artikulu bakoitza zein edukiontzitan utzi behar den eta zein materialez osatuta dagoen adieraziz. Gainera, testu edo ahots galderak euskaraz, gaztelaniaz, katalanez edo galizieraz egin daitezke.

A.I.R-e app bertsioan dago eskuragarri Google Play, App Store, Facebook Messenger, Twitter eta Alexan, eta baita web bertsioan ere, Ecoembesen webgunean bertan dagoen Chatboxaren bitartez.

3. Punto Limpio. ECOTIC Fundazioaren tresna elektriko eta elektronikoen hondakinak kudeatzeko aplikazio honekin, zure kokapenetik gertuen dituzun garbiguneak aurkitu ahal izango dituzu. Kokalekuak bi modutara erakuts daitezke: gailu mugikorraren kokapenaren bidez, hurbilen dauden bost puntuak bistaratuz, edo zuzenean, intereseko lekua zerrenda batetik hautatuz, autonomia-erkidegoak, probintziak eta udalerriak kontuan hartuta. Garbigunea aukeratu ondoren, nahikoa da 'Nola iritsi' sakatzearekin, eta aplikazioa Google Mapsekin konektatuko da nabigazio-argibideak emateko. Era berean, bilatzaileaz gain, birziklatzeari buruzko eduki praktikoak ere ditu aplikazioak.

Punto Limpio aplikazioa Google Play, App Store eta Punto Limpioren webgunetik bertatik eskura daiteke.

4. My Little Plastic Footprint. Aplikazio honen helburua 'aztarna plastikoa' murriztea da, hau da, material plastikoen kontsumoa murriztea. Horretarako, erabiltzen hasi aurretik, galdera sorta bete behar da, zein plastiko mota kontsumitzen diren adieraziz. Amaitzean, aplikazioak lortutako Masa Plastikoaren Indizea erakutsiko du, eta hura murrizten hastea izango da erronka. Hala, atal ezberdinen artean aukeratu ahal izango da (bainugela, sukaldea, bidaiak, etab.), eta aplikazioak atal bakoitzean zein plastikozko artikulu erabiltzen diren erakutsiko du, baita horiek plastikorik gabeko objektuekin ordezkatzeko alternatibak ere. Ordezkatu diren artikuluak zerrendatik ezabatuz joatean, Masa Plastikoaren Indizea gutxitzen joango da.

My Little Plastic Footprint app bertsioan baino ez dago eskuragarri, sakelako telefonoetarako eta tabletetarako, Google Play (Android) eta App Store (iPhone) aplikazioen bidez. Egun ez du web bertsiorik.